వీజెన్ బయో కార్-టీ చికిత్సకు న్యుసెలియాన్ సాంకేతిక సహకారం

వ్యాక్సిన్ల తయారీ సంస్థ భారత్ బయోటెక్‌కు చెందిన అనుబంధ సంస్థ న్యుసెలియాన్ థెరాప్యూటిక్స్, హైదరాబాద్‌కు చెందిన ప్రెసిషన్ ఆంకాలజీ సంస్థ వీజెన్ బయో ప్రైవేట్ లిమిటెడ్‌తో భాగస్వామ్యం కుదుర్చుకుంది. ఈ ఒప్పందంలో భాగంగా భారత్‌లో వినూత్న సెల్ థెరపీల అభివృద్ధికి అవసరమైన సాంకేతిక పరిజ్ఞాన బదిలీ, క్లినికల్ తయారీ, వాణిజ్య ఉత్పత్తి వంటి అంశాల్లో రెండు సంస్థలు కలిసి పనిచేయనున్నాయి. సెల్, జీన్ థెరపీల రంగంలో పరిశోధన, అభివృద్ధి, తయారీ సేవలను అందించే న్యుసెలియాన్.. అధునాతన క్యాన్సర్ చికిత్సల అభివృద్ధికి ఈ భాగస్వామ్యం ద్వారా తోడ్పడనుంది.

ఈ భాగస్వామ్యంలో భాగంగా, అధునాతన క్యాన్సర్ చికిత్స కోసం అభివృద్ధి చేస్తున్న వీజెన్ బయోకు చెందిన VL-2511 కార్-టీ (CAR-T) థెరపీ ఔషధానికి అవసరమైన సాంకేతిక పరిజ్ఞాన బదిలీ, వాణిజ్య తయారీకి న్యుసెలియాన్ సహకరించనుంది. అవసరమైన నియంత్రణ సంస్థల అనుమతులకు లోబడి దేశంలో మొదటి, రెండో దశ క్లినికల్ ట్రయల్స్ నిర్వహించాలని రెండు సంస్థలు యోచిస్తున్నాయి. క్లినికల్ పరీక్షల ఫలితాలు, నియంత్రణ అనుమతుల ఆధారంగా 2028 నాటికి ఈ చికిత్సను మార్కెట్లోకి తీసుకురావాలని లక్ష్యంగా పెట్టుకున్నాయి. హైదరాబాద్‌లోని ప్రత్యేక తయారీ కేంద్రంలో ఈ ఔషధాన్ని ఉత్పత్తి చేయాలని న్యుసెలియాన్ ప్రణాళిక రూపొందిస్తోంది.