స్టాక్ మార్కెట్‌పై నిర్మలా సీతారామన్ కీలక వ్యాఖ్యలు

స్టాక్ మార్కెట్‌లో ఒడుదొడుకులు, ప్రధాన సూచీల క్షీణతపై కేంద్ర ఆర్థిక మంత్రి నిర్మలా సీతారామన్ కీలక వ్యాఖ్యలు చేశారు. మదుపర్లు తమ వాటాలను సులభంగా విక్రయించగలగడం, దేశీయ మార్కెట్లో ద్రవ్యలభ్యత అధికంగా ఉండటం వల్ల భారత ఈక్విటీ మార్కెట్లలో లాభాల స్వీకరణ తక్కువగా ఉంటోందని పేర్కొన్నారు. థాయ్‌లాండ్‌లో ఓ మీడియా సంస్థకు ఇచ్చిన ఇంటర్వ్యూలో ఆమె భారత ఆర్థిక వ్యవస్థ, స్టాక్ మార్కెట్ పరిస్థితులపై మాట్లాడారు. అమెరికా అధ్యక్షుడు డొనాల్డ్ ట్రంప్ విధిస్తున్న సుంకాలు, భౌగోళిక రాజకీయ ఉద్రిక్తతలు ఉన్నప్పటికీ భారత ఆర్థిక వ్యవస్థ వృద్ధి ఆశాజనకంగా ఉందన్నారు. అయితే, ప్రధాన స్టాక్ మార్కెట్ సూచీలు సుమారు 12 శాతం క్షీణించడం, విదేశీ సంస్థాగత మదుపర్లు భారత ఈక్విటీల నుంచి పెట్టుబడులను ఉపసంహరించుకోవడం ఆందోళన కలిగిస్తోందని తెలిపారు. ఈ ఏడాది విదేశీ మదుపర్లు భారత ఈక్విటీల నుంచి 33 బిలియన్ డాలర్లకు పైగా నిధులను వెనక్కి తీసుకున్నట్లు పేర్కొన్నారు. ముఖ్యంగా తైవాన్‌, దక్షిణ కొరియాలోని కృత్రిమ మేధ (AI) సంబంధిత కంపెనీల వైపు పెట్టుబడులు మళ్లడం భారత మార్కెట్లపై ప్రభావం చూపుతోందని వివరించారు.

విదేశీ పెట్టుబడులు వెనక్కి వెళ్తున్నప్పటికీ, దేశీయ మదుపర్లు మార్కెట్‌కు నిరంతరం అండగా నిలుస్తున్నారని నిర్మలా సీతారామన్ చెప్పారు. కృత్రిమ మేధ రంగంలో పెట్టుబడులకు సంబంధించి ప్రపంచవ్యాప్తంగా బుడగ ఏర్పడి అది పేలినా, భారత్‌పై ప్రభావం పరిమితంగా ఉండవచ్చని అభిప్రాయపడ్డారు. దేశంలో ఏఐ రంగానికి సంబంధించిన పెట్టుబడులు ఇంకా భారీ స్థాయిలో లేకపోవడమే ఇందుకు కారణమని పేర్కొన్నారు. అధునాతన సాంకేతికతలో భారత్ వెనుకబడలేదని, సెమీకండక్టర్ల తయారీ రంగంలోనూ పెట్టుబడులు వస్తున్నాయని తెలిపారు. ప్రధాన సూచీలు పడిపోయినప్పటికీ, దేశ ఆర్థిక వ్యవస్థ పునాదులు బలంగా ఉన్నాయని వివరించారు. అయితే, విదేశీ పెట్టుబడుల ఉపసంహరణ కొనసాగితే 2027లో భారత మార్కెట్లకు సవాళ్లు ఎదురయ్యే అవకాశం ఉందని ఆందోళన వ్యక్తం చేశారు. మరోవైపు, 2021 మార్చి నుంచి ఈక్విటీ ఆధారిత మ్యూచువల్ ఫండ్లలోకి ప్రతి నెలా నికర పెట్టుబడులు వస్తుండటం, క్రమానుగత పెట్టుబడి పథకాల (SIP) ద్వారా దేశీయంగా నిధుల ప్రవాహం కొనసాగడం మార్కెట్‌కు మద్దతుగా నిలుస్తున్నాయని నిపుణులు పేర్కొంటున్నారు.