క్రెడిట్‌ స్కోర్‌ తక్కువగా ఉందా? ఈ టిప్స్‌ పాటించండి

బ్యాంకు లోన్లు, క్రెడిట్‌ కార్డులు, ఇతర రుణాలు పొందడంలో క్రెడిట్‌ స్కోర్‌ కీలక పాత్ర పోషిస్తుంది. స్కోర్‌ తక్కువగా ఉంటే రుణం మంజూరు కావడం కష్టమవడంతో పాటు, కొన్ని సందర్భాల్లో అధిక వడ్డీ రేట్లు కూడా ఎదురయ్యే అవకాశం ఉంటుంది. అయితే కొన్ని ఆర్థిక అలవాట్లను మార్చుకోవడం ద్వారా క్రెడిట్‌ స్కోర్‌ను క్రమంగా మెరుగుపరచుకోవచ్చు. ముఖ్యంగా లోన్‌ ఈఎంఐలు, క్రెడిట్‌ కార్డు బిల్లులను గడువు తేదీలోగా చెల్లించడం, అవసరమైతే రిమైండర్లు లేదా ఆటో-డెబిట్‌ సదుపాయాన్ని ఉపయోగించడం ప్రయోజనకరంగా ఉంటుంది. క్రెడిట్‌ కార్డు లిమిట్‌ను తరచుగా పూర్తిగా వినియోగించకుండా ఉండటం కూడా మంచిది.

ఒకేసారి అనేక రుణాలు లేదా క్రెడిట్‌ కార్డులకు దరఖాస్తు చేయడం కూడా నివారించాలి. ప్రతి దరఖాస్తులో రుణదాత క్రెడిట్‌ రిపోర్టును పరిశీలించే అవకాశం ఉండటంతో, తక్కువ వ్యవధిలో ఎక్కువ క్రెడిట్‌ విచారణలు జరగడం క్రెడిట్‌ ప్రొఫైల్‌పై ప్రభావం చూపవచ్చు. రుణ దరఖాస్తు తిరస్కరించబడితే వెంటనే ఇతర సంస్థలకు వరుసగా దరఖాస్తు చేయకుండా, తిరస్కరణకు కారణాన్ని తెలుసుకుని ముందుగా ఆ సమస్యను పరిష్కరించుకోవాలి. అలాగే మీ క్రెడిట్‌ రిపోర్టును క్రమం తప్పకుండా పరిశీలించడం అవసరం. మీరు తీసుకోని రుణం, తప్పుగా నమోదైన ఆలస్య చెల్లింపు, సరిగా అప్‌డేట్‌ కాని రుణ ఖాతా లేదా తప్పుగా చూపిస్తున్న బకాయి వంటి అంశాలు కనిపిస్తే సంబంధిత బ్యాంకు లేదా ఆర్థిక సంస్థకు ఫిర్యాదు చేసి సరిచేయించుకోవాలి.

చెల్లింపుల ఆలస్యం, అధిక క్రెడిట్‌ కార్డు వినియోగం లేదా క్రెడిట్‌ రిపోర్టులో ఉన్న తప్పుల కారణంగా స్కోర్‌ తగ్గితే, సమస్యలను సరిచేసిన తర్వాత ఆరు నెలల్లోనే కొంత మెరుగుదల కనిపించే అవకాశం ఉంది. అయితే గతంలో అనేకసార్లు చెల్లింపులు ఆలస్యం కావడం, దీర్ఘకాలంగా బకాయిలు ఉండటం వంటి తీవ్రమైన సమస్యలు ఉంటే స్కోర్‌ మెరుగుపడటానికి మరింత సమయం పట్టవచ్చు. అందువల్ల సమయానికి చెల్లింపులు చేయడం, క్రెడిట్‌ వినియోగాన్ని నియంత్రించడం, అవసరం లేని కొత్త రుణ దరఖాస్తులను తగ్గించడం, క్రెడిట్‌ రిపోర్టును పర్యవేక్షించడం వంటి అలవాట్లను కొనసాగించడం కీలకం.