పెరిగిన స్మార్ట్‌ఫోన్‌ ధరలు.. దశాబ్ద కనిష్ఠానికి భారత మార్కెట్‌!

స్మార్ట్‌ఫోన్‌ ధరలు పెరగడంతో భారత మార్కెట్‌ తీవ్ర ఒడుదొడుకులను ఎదుర్కొంటోంది. ఫోన్ల కొనుగోలు ఖర్చు పెరగడంతో వినియోగదారులు కొత్త ఫోన్లు కొనడాన్ని, పాత ఫోన్లను అప్‌గ్రేడ్‌ చేసుకోవడాన్ని వాయిదా వేస్తున్నారు. కౌంటర్‌పాయింట్‌ రీసెర్చ్‌ నివేదిక ప్రకారం.. 2026 మూడో త్రైమాసికంలో భారత స్మార్ట్‌ఫోన్‌ మార్కెట్‌ 20 శాతం క్షీణించింది. ఇది గత దశాబ్ద కాలంలో నమోదైన అత్యల్ప స్థాయిగా పేర్కొంది. 2026 ఏడాది మొత్తంగా ఈ మార్కెట్‌ సుమారు 13 శాతం తగ్గవచ్చని రీసెర్చ్‌ డైరెక్టర్‌ తరుణ్‌ పాఠక్‌ అంచనా వేశారు. విడిభాగాల ధరలు పెరగడం, వినియోగదారుల కొనుగోలు సామర్థ్యంపై ఒత్తిడి పెరగడం ఈ పరిస్థితికి ప్రధాన కారణాలుగా నిలిచాయి.

మార్కెట్‌లో అమ్మకాలు తగ్గినప్పటికీ, శాంసంగ్‌ 17 శాతం వాటాతో మళ్లీ అగ్రస్థానాన్ని దక్కించుకుంది. గెలాక్సీ ఏ సిరీస్‌ ఫోన్ల అమ్మకాలు, ఆన్‌లైన్‌, ఆఫ్‌లైన్‌ విక్రయ వ్యూహాలు సంస్థకు ప్రయోజనం చేకూర్చాయి. మరోవైపు, వివో మార్కెట్‌ వాటా 20 శాతం నుంచి 16 శాతానికి, ఒప్పో వాటా 13 శాతం నుంచి 12 శాతానికి తగ్గాయి. షావోమీ 8 శాతం వాటాను కొనసాగించగా, యాపిల్‌ వాటా 9 శాతం నుంచి 8 శాతానికి పడిపోయింది. దేశీయ బ్రాండ్లలో ఏఐ+ అత్యంత వేగంగా వృద్ధి చెంది, గత ఏడాది ఇదే త్రైమాసికంతో పోలిస్తే 306 శాతం వృద్ధిని నమోదు చేసింది. విడిభాగాల ఖర్చులు పెరగడం వల్ల ముఖ్యంగా రూ.15,000లోపు ఫోన్ల విక్రయాలు బలహీనపడ్డాయని కౌంటర్‌పాయింట్‌ రీసెర్చ్‌ విశ్లేషకుడు శుభమ్‌ సింగ్‌ తెలిపారు. రూ.20,000లోపు ఫోన్ల విభాగంలోనూ ధరల పెరుగుదల ప్రభావం స్పష్టంగా కనిపించిందని నివేదిక పేర్కొంది.