బంగారు ఆభరణాలపై ఓవర్‌డ్రాఫ్ట్ లోన్ తీసుకోవచ్చని మీకు తెలుసా?

ఆర్థిక అవసరాల కోసం చాలా మంది తమ బంగారాన్ని బ్యాంకుల్లో తాకట్టు పెడతారు. అలాగే, బంగారు ఆభరణాలపై ఓవర్‌డ్రాఫ్ట్ సదుపాయం కూడా బ్యాంకులు అందిస్తున్నాయి. ఇది సాధారణ పర్సనల్ లోన్ వలే కాకుండా, క్రెడిట్ లైన్ లాగా పనిచేస్తుంది.

సాధారణ గోల్డ్ లోన్‌లో, మొత్తం డబ్బును ఒకేసారి తీసుకుని దానిపై వడ్డీ చెల్లించాల్సి ఉంటుంది. కానీ ఓవర్‌డ్రాఫ్ట్ సౌకర్యంలో, మీ బంగారం విలువ ఆధారంగా బ్యాంక్ నిర్దిష్ట పరిమితితో రుణాన్ని మంజూరు చేస్తుంది. వినియోగదారుడు ఈ పరిమితి నుంచి ఎప్పుడైనా, అవసరమైన మొత్తాన్ని డ్రా చేసుకోవచ్చు.

ఇక్కడ మొదటి డ్రా చేసిన మొత్తం మాత్రమే వడ్డీకి లోబడి ఉంటుంది, మంజూరైన మొత్తం పరిమితిపై కాదు. ఈ రుణాలు సాధారణంగా ఒక సంవత్సరం లేదా అంతకంటే ఎక్కువకాలం చెల్లుబాటు అవుతాయి. అవసరమైతే, రుణాన్ని తిరిగి చెల్లించి, మళ్లీ డ్రా చేసుకోవచ్చు.

ఓవర్‌డ్రాఫ్ట్ సౌకర్యం పొందడానికి కొన్ని ధ్రువపత్రాలు సమర్పించాలి. సాధారణంగా 18 క్యారెట్ నుంచి 24 క్యారెట్ మధ్య స్వచ్ఛత కలిగిన బంగారు ఆభరణాలపై బ్యాంకులు ఈ సౌకర్యాన్ని ఇస్తాయి. వినియోగదారుడికి కావలసిన రుణ పరిమితిని బట్టి తగినంత బరువున్న బంగారం బ్యాంకుకు ఇవ్వాలి. సాధారణంగా, ఈ విలువలో 70%–75% వరకు ఓవర్‌డ్రాఫ్ట్ పరిమితి మంజూరు చేయబడుతుంది.

వడ్డీ రోజువారీగా లెక్కించబడుతుంది, సంవత్సరానికి 8%–15% వరకు మారవచ్చు. కొన్ని బ్యాంకులు ప్రాసెసింగ్ ఫీజు వసూలు చేస్తాయి, ఇది సాధారణంగా మంజూరైన పరిమితిలో 0.5%–1.5% వరకు ఉంటుంది.

ప్రస్తుతం, ఫెడరల్ బ్యాంక్ డిజి గోల్డ్ ఓవర్‌డ్రాఫ్ట్ స్కీమ్, CSB బ్యాంక్ ఓవర్‌డ్రాఫ్ట్ గోల్డ్ లోన్ స్కీమ్, తమిళనాడు మర్కంటైల్ బ్యాంక్ (TMB) గోల్డ్ ఓవర్‌డ్రాఫ్ట్ స్కీమ్, యూనియన్ బ్యాంక్ ఆఫ్ ఇండియా బంగారు ఆభరణాలపై ఓవర్‌డ్రాఫ్ట్ అందుబాటులో ఉన్నాయి.