వరల్డ్ రిచేస్ట్ పర్సన్ ఎలోన్ మస్క్ రికార్డ్..

టెస్లా, స్పేస్ ఎక్స్ సంస్థల అధినేత ఎలాన్ మస్క్ మరో చరిత్ర సృష్టించారు. 700 బిలియన్ డాలర్ల పైచిలుకు నికర సంపద కలిగిన తొలి వ్యక్తిగా రికార్డు సృష్టించారు. 2018 నాటి టెస్లా పారితోషికానికి సంబంధించి ఇటీవల కోర్టులో అనుకూల తీర్పు వెలువడటంతో మస్క్ నికర సంపద 749 బిలియన్‌ డాలర్‌లకు చేరింది.

2018లో టెస్లా సంస్థ మస్క్‌కు ఆఫర్ చేసిన పారితోషికాన్ని పునరుద్ధరిస్తూ డెలావేర్ సుప్రీం కోర్టు తాజాగా తీర్పు వెలువరించింది. ఈ ప్యాకేజీ చెల్లదంటూ అంతకుముందు కింది కోర్టు ఇచ్చిన తీర్పును పక్కనపెట్టేసింది. మస్క్‌కు పారితోషికం కింద కొన్ని స్టాక్ ఆప్షన్స్ ఇచ్చేందుకు టెస్లా బోర్డ్ 2018లో అంగీకరించింది. అప్పట్లో వీటి విలువ 56 బిలియన్ డాలర్లు.

అయితే, ఈ ప్యాకేజీని వ్యతిరేకిస్తూ ఓ షేర్ హోల్డర్ కోర్టును ఆశ్రయించారు. ఈ ప్యాకేజీని ఆమోదించిన టెస్లా బోర్డ్ ఆఫ్ డైరెక్టర్స్ మస్క్‌కు సన్నిహితులని ఆరోపించారు. ఈ వాదనలతో కోర్టు ఏకీభవించింది. అంతటి పారితోషికాన్ని మంజూరు చేయడం అసాధారణమని, అది చెల్లదని తీర్పు వెలువరించింది. ఈ నేపథ్యంలో మస్క్ పైకోర్టును ఆశ్రయించారు. 2024లో సంస్థ షేర్ హోల్డర్‌లు మరోసారి ఈ ప్యాకేజీని అంగీకరించిన విషయాన్ని కోర్టు దృష్టికి తీసుకెళ్లారు. దీన్ని రద్దు చేస్తే ఆరేళ్లుగా తను పడ్డ శ్రమ వృథా అయిపోతుందని అన్నారు. దీంతో, డెలావేర్ సుప్రీం కోర్టు మస్క్‌కు అనుకూలంగా తీర్పు వెలువరించింది.

ఇటీవలే టెస్లా బోర్డు మస్క్‌కు భారీ పారితోషికాన్ని ప్రకటించిన విషయం తెలిసిందే. సంస్థ పనితీరు మెరుగయ్యే కొద్దీ గరిష్ఠంగా ట్రిలియన్ డాలర్ల పారితోషికం చెల్లించేందుకు బోర్డు అంగీకరించింది. అయితే, ఈ మొత్తం అందాలంటే ఏఐ, రోబోటిక్స్, మార్కెట్ వృద్ధిలో టెస్లా సంస్థ కొన్ని లక్ష్యాలను చేరుకోవాల్సి ఉంటుంది. ఇక తాజా పరిణామాల నేపథ్యంలో శుక్రవారం మస్క్ నికర సంపద విలువ 749 బిలియన్ డాలర్లకు చేరుకుంది. మస్క్ తరువాతి స్థానంలో ఉన్న గూగుల్ సహ వ్యవస్థాపకుడు లారీ పేజ్ నికర సంపద 500 బిలియన్ డాలర్లు.