ఎల్‌టీసీజీ పన్నుపై కేంద్రం క్లారిటీ

లిస్టెడ్ ఈక్విటీలపై లాంగ్ టర్మ్ క్యాపిటల్ గెయిన్స్ (LTCG) పన్నును రద్దు చేసే ప్రతిపాదన ప్రస్తుతం లేదని కేంద్ర ప్రభుత్వం లోక్‌సభలో స్పష్టం చేసింది. రిటైల్, దేశీయ ఇన్వెస్టర్ల కోసం ఈ పన్నును తొలగించే యోచన లేదని కేంద్ర ఆర్థిక శాఖ సహాయ మంత్రి పంకజ్ చౌదరి లిఖితపూర్వక సమాధానంలో తెలిపారు.

మార్కెట్ సెంటిమెంట్‌ను పెంచేందుకు ఎల్‌టీసీజీ పన్నును తొలగించాలని మార్కెట్ వర్గాలు కోరుతున్నప్పటికీ, పన్ను విధానాలను కేంద్ర ప్రభుత్వం ప్రతి బడ్జెట్ సమయంలో దేశ ఆర్థిక పరిస్థితులను దృష్టిలో ఉంచుకుని సమీక్షిస్తుందని మంత్రి పేర్కొన్నారు. అయితే ప్రస్తుతానికి ఈ పన్నులో మార్పులు లేదా రద్దుపై ఎలాంటి నిర్ణయం తీసుకోలేదని స్పష్టం చేశారు.

ఇక ఎల్‌టీసీజీ పన్ను ద్వారా ప్రభుత్వానికి వచ్చే ఆదాయం గణనీయంగా పెరిగిందని కేంద్రం వెల్లడించింది. 2024-25 అసెస్‌మెంట్ ఇయర్‌లో రూ.72,249 కోట్లుగా ఉన్న వసూళ్లు, 2025-26లో రూ.1,29,158 కోట్లకు చేరి 78 శాతం వృద్ధి సాధించాయి. ప్రస్తుతం ఒక ఆర్థిక సంవత్సరంలో రూ.1.25 లక్షలు మించిన దీర్ఘకాలిక లాభాలపై 12.5 శాతం, షార్ట్ టర్మ్ క్యాపిటల్ గెయిన్స్‌పై 20 శాతం పన్ను అమలులో ఉంది.