హైదరాబాద్‌లో యాపిల్ రిటెయిల్ స్టోర్‌కు సన్నాహాలు, ఉద్యోగ నియామకాలు ప్రారంభం!

దేశీయంగా సొంత రిటెయిల్ కేంద్రాలను విస్తరిస్తున్న ఐఫోన్ తయారీ సంస్థ Apple హైదరాబాద్‌లో తదుపరి విక్రయ కేంద్రాన్ని ప్రారంభించేందుకు సిద్ధమవుతోంది. ఈ నేపథ్యంలో ఉద్యోగుల ఎంపిక కోసం యాపిల్ తన అధికారిక కెరీర్ పోర్టల్‌లో నోటిఫికేషన్ విడుదల చేసింది. అవుట్‌లెట్ మేనేజర్, సీనియర్ మేనేజర్, స్టోర్ లీడర్, రిటెయిల్ మేనేజర్, టెక్నికల్ స్పెషలిస్ట్, బిజినెస్ ఎక్స్‌పర్ట్స్, ఆపరేషన్స్ ఎక్స్‌పర్ట్స్‌తో పాటు పూర్తి కాలం, పార్ట్‌టైమ్, కాంట్రాక్ట్ ప్రాతిపదికన వివిధ పోస్టులను భర్తీ చేయనున్నట్లు వెల్లడించింది.

భారత్‌లో యాపిల్ తన రిటెయిల్ నెట్‌వర్క్‌ను వేగంగా విస్తరిస్తోంది. 2023లో ముంబయిలో ‘యాపిల్ బీకేసీ’, దిల్లీలో ‘యాపిల్ సాకేత్’ పేర్లతో తొలి స్టోర్లను ప్రారంభించిన సంస్థ, గత ఏడాది బెంగళూరు, పుణె, నోయిడాల్లో కొత్త స్టోర్లను ప్రారంభించింది. ఇప్పుడు హైదరాబాద్‌లోనూ స్టోర్ ప్రారంభానికి చర్యలు చేపట్టడం నగర ప్రాధాన్యతను మరింత పెంచుతోంది.